港聞

港聞二

下一篇
上一篇

【Emily】兩派對罵 大埔區議會流會

【明報專訊】反修例風波未止,部分區嘅區議會亦因此開唔成。其中噚日大埔區議會大會,原定討論對主席黃碧嬌嘅不信任動議,議程未正式開波,旁聽席就有兩派人馬對罵,混亂中一名女子報稱被反修例示威者襲擊,要報警送院治理。大會副主席鄭俊平話會議無法繼續,宣布流會。

事緣7月,大埔區議會主席黃碧嬌拒絕喺大會討論撤回《逃犯條例》修訂,引起民主派區議員不滿,並發起不信任動議。噚日大埔區議會會議室人山人海,兩派人馬分別拎標語同叫口號,一邊有人大叫「一票不投民建聯」,另一邊人就叫「不要政治議題」。

進入咗不信任動議議程後,大叫「不要政治議題」嘅市民繼續嗌,仲有人用粗口鬧民主派區議員,混亂中有個女人大叫「畀人打」同「頭暈」,由民建聯區議員報警送院。民建聯區議員胡健民發稿話,強烈譴責上述「暴力襲擊行為」破壞議會莊嚴同秩序。

上 / 下一篇新聞