港聞

港聞二

下一篇
上一篇

【Emily】晚晚抬棺破地獄 哈囉喂恐怖機關藏廁所

【明報專訊】海洋公園一年一度嘅「哈囉喂」喺10月4日至31日舉行,將恐怖氣氛延伸屋外,園區設有六大鬼域。今年比舊年夜收一個鐘,可以玩到12點,最特別地方係每晚8點44分有冥府出閘嘅抬棺出殯巡遊破地獄,而10點半公園每個角落嘅遊魂野鬼更加會集體靈魂出竅,務求將所有賓客都嚇破膽。

參考港產片 舊屋邨變鬼域

海洋公園今年一樣投資8位數字。海洋公園演藝節目總監歐陽綺華率先透露,今年創作概念由鬼屋伸展到鬼域,有參考港產片同經典鬼古,配合市民非常熟悉嘅場景。例如「香港靈異結界」,當中有舊屋邨、滑梯、小巴站等,令遊人代入故事角色,有如置身恐怖廢墟中。

至於「盂蘭老大街」,今年園方首次將其中一個廁所改建,增設機關,大家聽到都可能有啲驚,歐陽綺華叫大家放心,入面無演員嚇人,只有燈光同音響,營造恐怖感!

海洋公園早前講過,受訪港旅行團及自由行遊人數目大減影響,今年暑假檔次公園總人場人次跌幅顯著,7至8月入場人數比舊年同期跌兩成六。問及園方預期今年哈囉喂入場人次時,發言人就話今年企業包場有12場,比舊年6場倍增,希望加埋人流可以保持同去年相若。提提大家,今年公衆哈囉喂活動日得10日,分別係10月4、11、18至20、24至27同31日,比舊年少咗6日。

相關字詞﹕哈囉喂 海洋公園

上 / 下一篇新聞