港聞

港聞二

下一篇
上一篇

【Emily】泛民想邱騰華做特首? 卿姐澄清紐時報道

【明報專訊】反修例風波至今不時傳出特首林鄭月娥有意辭職,林太縱已否認,仍引發政圈不時討論接任人或下屆特首人選。《紐約時報》亦盤點潛在人選,並引述民主黨前主席劉慧卿話,泛民想北京揀商經局長邱騰華做特首,卿姐噚日就澄清報道不正確。

《紐約時報》日前一篇報道列出多個有可能「跑馬仔」接任特首嘅人選,仲逐個查詢回應。被報道形容係最受北京青睞嘅財政司長陳茂波,拒絕接受訪問;政務司長張建宗亦拒訪,只係話唔回應推測問題,會一如既往全心全意服務港人。行政會議召集人陳智思回應《紐時》話自己有生意要做,「不願意放棄生意」;全國政協常委唐英年透過發言人話佢支持林太,無意再爭取做特首。

稱無資格代泛民就此發言

報道引述卿姐話,民主派希望北京揀邱騰華做特首,但邱騰華就回應「不想」,並認為自己係行政人員(administrator)。卿姐噚日喺facebook特別澄清報道不正確,指8月20日喺外國記者會遇到撰寫報道嘅紐時記者,閒談中提到數名傳媒報道可能成為特首嘅人選,當中包括邱騰華。

卿姐強調從未得悉民主派人士希望北京揀邱騰華做特首,更加冇資格代表民主派就此事發言。

上 / 下一篇新聞