港聞

港聞二

下一篇
上一篇

【Emily】士丹頓街戰後唐樓 古諮會倡評二級

【明報專訊】古諮會下周四(12日)開會,政府將交代為1950年後落成嘅戰後建築評級嘅準備工作進度。Emily發現近年確實拆咗唔少戰後建築,不過凡事都有例外,好似中環士丹頓街88及90號戰後唐樓,評審小組建議評二級;另戰前興建嘅大嶼山昂坪「海天一境」牌坊同銅鑼灣加路連山道石牆及瓦管分別建議評為二級同三級,古諮會下周討論。

據古諮會資料,士丹頓街88及90號唐樓建於1951年,屬市建局「H19」重建範圍。據Emily所知,早年曾有清拆爭議,但因應社會嘅保留訴求,市建局研究緊推行活化。中西區關注組曾研究該兩幢樓,發現唐樓興建時嘅業主係《華僑日報》創辦人岑維休同陳楷,佢哋同屋企人曾喺唐樓住過一陣。

保留50年代特色 盼考慮舊區氛圍

關注組召集人羅雅寧話,昔日士丹頓街、城皇街一帶叫「卅間」社區,88同90號仍保留1950年代嘅唐樓特色,值得有評級,並希望市建局保育時一併考慮整個舊社區嘅氛圍。

另外,因應近年戰後建築有拆卸危機,Emily留意到,關注團體活現香港交咗《施政報告》建議,指過去兩年至少9座有代表性嘅現代建築已被拆、正在被拆或面臨拆卸,籲政府優先處理保育戰後建築,如全面普查同評級,並制定評審準則,評估佢哋嘅文物價值。

相關字詞﹕戰後唐樓 士丹頓街88及90號 古諮會

上 / 下一篇新聞