港聞

港聞二

下一篇
上一篇

【Emily】高志森倡效歐美 警發記者證 記協:內地、朝鮮、蘇丹先咁做

【明報專訊】反修例示威浪潮持續近3個月,傳媒往往企到最前線拍攝同記錄事件真相。早前因為貼出ISIS相遭facebook封鎖帳戶嘅導演高志森,就喺facebook向香港記者協會「開刀」,聲稱喺近月新聞影片見到好多記者阻撓警方執法,甚至有假記者證等,呼籲「萬人投書」取消記協嘅權力。高志森仲要求取消現有嘅記者證,以及要求香港嘅記者證需要由警務處發出,「配合現時歐美嘅做法」咁話。記協就喺facebook貼文,駁斥同指正高志森呢番言論。

記協回應話:「高志森先生:你搞錯咗喇!」記協指出,歐盟多國嘅警察係唔會發出記者證,全部都畀當地嘅工會發;至於荷蘭同紐約,當地警察係有發記者證,因為記者可以揸住呢張證入埋警方封鎖線,反而香港嘅記者證就唔得喇,又過唔到封鎖線,又防唔到警方發放嘅胡椒水。

荷蘭紐約警發證可入封鎖線

記協又話,真正由政府或者警察發記者證嘅國家,就包括有中國內地、北韓(朝鮮)、敘利亞、蘇丹、土庫曼斯坦等,仲話詳情可以參考無國界記者嘅網站,撳入去全球最冇新聞自由國家嘅名單就可以搵到。

相關字詞﹕反修例示威 記協

上 / 下一篇新聞