港聞

港聞二

下一篇
上一篇

【Emily】之鋒阿廸Lester赴台 鼓勵辦撐港集會

【明報專訊】香港眾志秘書長黃之鋒、立法會議員朱凱廸,同埋學聯前秘書長岑敖暉(Lester)一行3人噚日順利去到台灣,之鋒同阿廸都喺facebook出post,話今次去台灣有3樣嘢要做,當中最重要嘅係鼓勵台灣總動員,可以促成一次台灣民眾支持香港嘅大型集會;另外亦會透過講座同會面,畀台灣社會了解香港嘅最新情况,並了解台灣政界對赴台港人提供「人道求助」嘅諗法。

之鋒話,台灣同香港係「命運共同體」,面對同一個專制政權嘅威脅,相信如果台灣民眾以大規模行動支持香港,畀中共睇到台港人民嘅團結,就會帶嚟極大力量。佢話,港台兩地流行講「今日香港,明日台灣」,但佢認為兩制喺香港已經全面崩壞,希望台灣人係香港人嘅後盾,一齊勇敢共同抵抗中共壓迫,香港亦唔好再預設係必然失敗嘅弱者,要試講「今日台灣,明日香港」,爭取同捍衛民主自由。

黃之鋒上周被捕,被控涉嫌6月21日喺夏愨道煽惑他人參與未經批准集結、灣仔警察總部外參與未經批准集結以及涉嫌組織該未經批准集結。當日之鋒提堂後獲准保釋,主任裁判官錢禮批准佢前往台灣,與當地立法院成員舉行座談會,佢之後亦會喺柏林圍牆前發表演講、到美國會見《時代》雜誌同《華爾街日報》編輯。

上 / 下一篇新聞