港聞

港聞二

上一篇

【Emily】英邀兩議員出席現代奴隸制工作坊

【明報專訊】英國英聯邦議會聯合會向立法會發出邀請,希望邀請兩名議員出席12月16至18號喺澳洲珀斯舉行嘅「現代奴隸制項目:專家地區工作坊」,探討議會委員會喺打擊販運人口活動及強迫勞動方面嘅角色。立法會保安事務委員會噚日發出文件,話17名議員同意邀請,但最終有無議員參與,相信要待立法會復會後,由內委會經程序同意出訪代表。

睇番資料,自由黨黨魁鍾國斌3月底曾去英國倫敦,參加該聯合會舉辦有關現代奴隸制嘅法律起草研討會,當時其實有兩個名額,但只有鍾國斌報名。

立法會噚日亦發電郵畀議員,交代上周六立法會有咩設施畀示威者損壞,包括保安更亭玻璃窗、電腦設備、冷氣機、電掣箱同更亭外嘅閉路電視鏡頭、「煲底」玻璃面板共11塊等,秘書處亦發現停車場入口地面被撒黃豆、鐵閘畀人用膠帶同膠喉綑綁、「煲底」地面有不明白色粉末等。秘書處話緊急維修工程已展開。

上 / 下一篇新聞