港聞

港聞二

下一篇
上一篇

【Emily】「最後大會」 離島區會為東涌爭街巿

【明報專訊】11月24號就係區議會選舉,離島區議會噚日舉行最後一次大會,喺咁嘅政治環境下,區議會仍落力跟進民生事項,並一致通過要求政府全面檢視東涌未發展或閒置用地設置臨時街市。

東涌社區發展陣線組織幹事陳淑淇話,團體促請食衛局正視居民同區議會聲音,設立專款專項撥款,為東涌或其他新市鎮喺公眾街市落成前覓地設置臨時街市,佢認為臨時街市不論規模定興建時間都相對簡單同快,但政府經常推搪,希望未來新一屆區議會設立街市同墟市小組,集中討論增設公眾街市,同時亦促請政府增撥資源,喺公眾街市落成前設置臨時街市或濕貨墟市,以盡快回應居民所需。

無官員出席 一頁紙回覆

Emily 問過工聯會離島區議員鄧家彪,佢話噚日一致通過動議,但政府無派官員出席,只係用一頁紙書面回覆,話願意配合搞臨時街市云云。鄧家彪來屆區選有意轉戰沙田水泉澳,佢話噚日係佢告別離島區議會前最後一次大會,都有唔捨得。阿彪話有人會笑離島區議會係過分和諧,的確區議員同事之間可以有傾有講,佢相信亦係少數唔會限制議員發言時間嘅區議會。阿彪另一樣唔捨得嘅係該區民政專員,大讚對方為咗社區會超越常規咁諗辦法解決問題。

上 / 下一篇新聞