港聞

港聞二

下一篇
上一篇

【Emily】國父上GEAR

【明報專訊】噚日開學日有學生罷課,除咗有學生戴晒裝備請願,連校園嘅孫中山像都畀人上「 gear」。喺邊度見到?咪就係孫中山母校皇仁同港大囉。

皇仁港大銅像齊戴豬嘴

立法會議員何君堯曾經去信校園要求澄清對學生罷課立場,佢母校皇仁書院噚日就有過百學生同舊生,喺校門外戴住豬嘴、頭盔、眼罩等裝備,高叫「光復香港,時代革命」、「五大訴求,缺一不可」等口號。唔止咁,有學生仲幫學校入面嘅孫中山銅像戴埋防護裝備。

唔止皇仁,港大荷花池隔籬嘅孫中山銅像都有上gear,唔止頭盔豬嘴,仲有一塊寫住「光復香港」嘅浮板喺手。

另外,有得玩fb嘅中國外交部駐港特派員公署噚日都出post,話央視播出特別節目《開學第一課》,以「五星紅旗,我為你自豪」為主題,講澳門濠江中學老校長杜嵐1949年嗰陣喺學校頂住重重壓力,升起五星紅旗,仲話50年後,1999年澳門回歸嗰日,當時已經87歲嘅杜校長原本篤住拐杖行,但嗰日佢將拐杖放低「奔向升旗台」,親自升起五星紅旗。嘩,真係好神奇。

上 / 下一篇新聞