港聞

港聞二

下一篇
上一篇

【Emily】馬季開鑼 回歸後首次特首高官缺席

【明報專訊】新一年度馬季噚日3號風球之下喺沙田馬場開鑼,但無阻馬迷熱情,全日10場賽事投注額高達12.88億元,較上季開鑼日多,入場人數就只有約6.8萬,較去年開鑼日少咗近一成,但仍然係過去25年第4高。不過,去年主持馬季開鑼兼自稱熟手技工嘅特首林鄭月娥就無出席。

馬會主席頒特首盃

回歸以嚟,馬會每年都會喺開鑼日舉行特首盃賽事,並由特首擔任主禮嘉賓同特首盃嘅頒獎嘉賓,即使特首唔出席,都會由其他高官出席主禮及頒獎。但今年就無咗呢個安排,噚日開鑼日無任何主要官員出席,係回歸以來首次。噚日嘅特首盃賽事排喺第3場舉行,結果由「帝豪福星」勝出,賽後由馬會主席周永健頒獎盃畀馬主黃順源。

旺財唔旺丁 12.88億投注超去年

噚日開鑼日旺財但唔旺丁,不過馬會行政總裁應家栢對開鑼日成績非常滿意,佢話喺目前政治環境下,仍有逾6.8萬人入場,兼且氣氛非常好,感到好鼓舞,希望能夠保持呢個勢頭。

對於投注額較上季多,應家栢話之前估計會跌10%至15%,𠵱家反而有升,多謝馬迷支持。佢話如果計本地投注額係跌1%,但考慮目前環境,已非常好;匯合彩池就由1.58億元增至2.09億元,成績理想。

上 / 下一篇新聞