港聞

港聞二

下一篇
上一篇

【Emily】車仔球迷會同警察割席 利迷曼迷世紀攜手

【明報專訊】警方近月執法手段備受質疑,警民關係跌入低谷,英超球會車路士嘅香港官方球迷會噚日喺fb發帖文,話鑑於近日警民矛盾,若有任何會員係現役警員,該會「誠心呼籲閣下退出本會,只要能夠出示委任證,本會會無條件退回會費,並額外附上$5」,希望警員寄回會員證。該會強調此舉同政治立場無關,係畀現職警員嘅「特別安排」。帖文一日內吸逾2.6萬個讚好同「心心」,仲令利物浦同曼聯迷歷史性咁企喺同一陣線。

車路士球迷會發聲後,歐洲四大足球聯賽,即英超、西甲、意甲同德甲球隊多個香港官方或非官方球迷會,包括曼聯、華倫西亞、帕爾馬同多蒙特等都出聲明同警方「割席」,亦有唔少球迷會好似巴塞、皇馬、拜仁慕尼黑等出帖批評警方。

經歷希斯堡慘劇

利迷:無法無視警濫權

香港利物浦球迷會一班幹事以個人名義發帖,提到1989年多名利迷喪生嘅「希斯堡慘劇」,話對利物浦嚟講,民生、政治同足球一直密不可分,作為利迷更無可能對警察濫權視而不見,呼籲利迷「恥與黑警為伍」;作為警察嘅會員就應該離開警隊。

香港拉素球迷會提及,2007一場球迷衝突,有拉素球迷被警員流彈擊斃,球迷群起示威但被打壓,之後意大利政府多次致歉,並強調會嚴正調查。球迷會反問「對比之下,香港呢?」並提到「慶幸本會應無警察臥底,惟若有警察為本會成員,請自行割席」。

上 / 下一篇新聞