港聞

港聞二

下一篇
上一篇

【Emily】政府拍片叫珍惜呢個家 網民:見證港人返工返工再返工

【明報專訊】最近兩個幾月示威一個接一個,唔少演變成衝突,政府新聞處噚日上載一條以「珍惜香港 這個家」為題嘅短片,內容主要係展示香港人嘅日常生活,例如清潔工清理街道、白領喺寫字樓返工、雞蛋仔同菜檔做生意等,片尾有男旁白話:「呢個屋企,用我哋每一個香港人嘅努力而建立,珍惜香港,呢個家。」

西裝男疑似非法佔據馬路

片段噚日中午大概12點上載YouTube,到噚晚約9點有近6000次點擊播放,唔少官員同政府部門亦都喺fb轉載,包括特首林鄭月娥。

正所謂「識睇睇留言」,網民對呢段短片有唔同解讀,例如片中其中一個shot係一個西裝look男士喺馬路上行,有人就話唔知算唔算非法佔據馬路?又有人話片末畫面雲中射出陽光,唔知係代表烏雲蔽日定係雨過天青。

有人留言支持動用緊急法

Emily去林鄭月娥fb睇吓佢share段片個post嘅留言,唔少網民都係表達不滿,包括留言「五大訴求,缺一不可」,有人話「上一秒拉人,下一秒話珍惜這個家,嘔吾(唔)嘔心啊,你破壞緊這個家啊!」,有人就話「條片除咗見香港人返工返工再返工之外」乜都冇;亦有網民留言話支持警察,或者要求政府盡快動用《緊急法》。

相關字詞﹕五大訴求 林鄭月娥 反修例風暴 政府新聞處

上 / 下一篇新聞