港聞

港聞二

上一篇

【Emily】二陂坊「文化協會」滿佈電動麻將枱

【明報專訊】星期日(25日)「荃葵青遊行」結束後,有30幾個示威者去到二陂坊同大陂坊,破壞多間被指同黑幫有關嘅店舖,其中一間叫做「中元節文化協會」;第二朝Emily到現場睇吓,發現位於二陂坊11A嘅「中元節文化協會」入面,有好多張電動麻將枱,牆上仲貼住「從2019年1月1日起,所有會員必須現金買碼」通告。Emily查吓民政事務總署個名冊,但就搵唔到呢間協會有「麻將/天九牌照處所」及「會社」牌照紀錄。再查一查,呢間「中元節文化協會」於2015年成立,會長楊桂生係董事兼最大股東,Emily諗住搵會長傾吓偈,但協會內有把男聲話:「日日咁多傳媒嚟,我點招呼得晒?」

示威者曾衝擊 警另一處拘股東

警方話佢哋早於7月25日去過二陂坊掃賭,喺二陂坊1號「新華威超市」閣樓搗破一個非法麻將檔,拉咗兩個主持同8個賭客,涉嫌「經營無牌賭博場所」、「協助經營無牌賭博場所」及「在賭博場所內賭博」等,案情仲話同「中元節文化協會」有關。Emily收到風,原來當日警方行動針對多個地點,包括埋文化協會,點知會長楊桂生因為喺超市閣樓做賭檔主持已畀阿sir拉咗。

相關字詞﹕麻雀 麻將 非法賭檔 非法賭博

上 / 下一篇新聞