港聞

港聞二

下一篇
上一篇

【Emily】是否撤何君堯會籍 皇仁舊生會啟程序

【明報專訊】立法會議員何君堯(圖)喺7.21元朗襲擊事件當晚,被拍攝到同白衣人握手,並讚佢哋係「英雄」,佢母校皇仁書院一批師生之後聯署譴責,要求皇仁舊生會廢除何嘅會籍;舊生會噚日向全體會員發電郵,話接獲大量「清晰而明確」嘅意見,舊生會將收集所有會員意見,包括詢問會員係咪同意舊生會成立特別調查委員會,跟進何君堯相關行為操守。

逾2500新舊生表達意見

舊生會嘅電郵話,收到逾2500名學生同舊生透過簽名及其他渠道所表達嘅意見,舊生會跟進事件時會公平公正地收集各個會員意見,並透過問卷向會員提出4條問題,包括會員係咪同意當有會員嘅行為操守損害舊生會名譽同利益時,執委會應啟動程序考慮取消其會籍;同唔同意成立特別委員會調查;以及若委員會裁定取消相關會員會籍,執委會應否通過裁定等。

舊生會收集意見期限係9月11日,目標今年內完成整個程序。同樣係皇仁舊生嘅會計界民主派議員梁繼昌,話如果大部分會員支持成立特別委員會調查,執委會就會成立相關委員會,若委員會調查得出嘅結果證明何君堯行為不當,佢嘅會籍就會自動被廢除。

相關字詞﹕元朗襲擊 皇仁書院 何君堯

上 / 下一篇新聞