港聞

港聞二

下一篇
上一篇

【Emily】袁彌昌辭智庫 葉劉:係我炒佢

【明報專訊】匯賢智庫政策顧問袁彌昌呢排喺反修例運動上成日表態,仲聯署要求撤回修例,同太太、新民黨立法會議員容海恩立場好唔同,袁彌昌噚日同Emily講,佢8月初已經向匯賢智庫主席葉劉淑儀提出請辭,一來唔想令老婆同葉太尷尬,二來亦因為智庫嘅工作停頓。不過,一手招攬袁彌昌、可以話係袁氏夫婦媒人嘅葉太噚日話,「係我炒佢(袁彌昌)嘅,佢做唔到嘢」,又話同袁彌昌喺反修例運動上嘅立場無關。

究竟實情係點?袁彌昌話,月初同葉太傾智庫嘅工作時大家好平和,因為修例風波,令原本想做嘅國民身分認同研究停頓咗,主要係因為冇嘢做,所以大家和平「分手」。智庫仲有兩名下屬同袁彌昌一齊走,葉太好激動咁同Emily澄清,另外兩個員工走係因為私人理由,唔係因為政治環境,智庫會繼續請人。對於袁彌昌嘅評價,佢話唔想再講,因為唔想唱衰人。

另兩人離開 葉劉話無關反修例

就葉太批評袁彌昌做唔到嘢等等,袁彌昌就話唔會怪葉太。袁彌昌喺facebook話「其實阿太平時對我哋好好嘅,係個好上司嚟,不過佢又真係好有性格,可能呢排心情唔好啫,唔好怪佢」。

相關字詞﹕匯賢智庫 葉劉淑儀 容海恩 袁彌昌 新民黨 反修例風暴

上 / 下一篇新聞