港聞

港聞二

下一篇
上一篇

【Emily】施永青:六七圍過域多利 明白青年圍警署

【明報專訊】反修例風波影響市道,中原地產主席施永青話最近生意額按年跌咗五至六成,仲差過SARS;不過佢噚日唔係講經濟,反而講起好多學生被捕,令佢諗起當年有同學因為六七暴動被判監,佢都試過去圍域多利監獄追究責任,所以佢明白𠵱家啲青年點解會圍警署。

施永青喺「學童快樂指數」記者會上,話自由、自主、自發係快樂嘅重要基礎,希望家長唔好排滿晒小朋友嘅時間表,應該畀啲空間等佢哋有空閒反思、訓練思維、探索知識,咁學童先會開心。

但近期唔少學生被捕,學界似乎唔多開心,施永青就諗起當年,中學時啟蒙咗個同學參加政治活動,點知嗰位同學喺六七暴動時被捕,佢既要向同學仔家長交代,仲要說服佢哋唔好簽保,因為簽保等於認錯,之後同學被判監一年,佢幫手瞞住同學仔外婆,講大話指同學去咗外國讀書。

佢話當年圍過域多利監獄,覺得要追究責任,所以明白如今青年點解要圍警署,不過明白唔等於支持,佢講明「香港既無暴徒,又無暴政」,仲話示威者本來想「反送中」,𠵱家《逃犯條例》修訂都停咗,「大家係咪要為呢件事攬炒呢?」佢勸大家唔好為一時意氣令其他市民受影響,「我就唔支持攬炒嘅」。

上 / 下一篇新聞