港聞

港聞二

下一篇
上一篇

【Emily】與智能燈柱公司合作 中大課程刪帖

【明報專訊】前日觀塘反修例遊行其中一個「目標」係區內嘅智慧燈柱,政府早前多次澄清話燈柱唔會有人面辨識功能,亦唔會侵犯私隱,但平息唔到猜疑。fb專頁「CUHK Secrets」有帖文,話發現中大「數據科學及政策研究」課程(DSPS)同有份發展香港智慧燈柱嘅公司Ticktack Technology有合作,但前日靜靜咁將相關嘅post刪走,質疑「『智慧』燈柱唔係一件光明正大嘅事嚟㗎咩?點解要收收埋埋?」

DSPS噚日出聲明回應,解釋由於前日發生嘅事同社會氣氛,為免惹起同學、家長及公眾誤解,同事將早前嘅帖文暫時收起,對於反而引起更多誤會,佢哋深感歉意,特此澄清。

DSPS又話,一直積極同不同大學、公營機構、商界探索合作機會,希望為同學提供更多元選擇;而該公司創辦人係中大社會科學院嘅校友,DSPS嘅老師年初有同Ticktack Technology會面,但強調無簽任何正式協議。

上 / 下一篇新聞