港聞

港聞二

下一篇
上一篇

【Emily】泛民張張區選撞區 互批非同路人

【明報專訊】民主派有意喺11月區議會選舉搶灘,但觀塘曉麗選區就撞區,「曉麗新動力」張敏峯同「反自動當選運動」成員、黃大仙區議員譚香文助理張隆有意出選,張敏峯話上周六協調會上兩人有共識,嚟緊周日開居民大會搞初選,但到周二「反自動當選」團隊否認。張敏峯噚日喺fb話,多數居民認為居民大會應如常舉行,佢WhatsApp叫張隆出席;譚香文向Emily批評張敏峯逼張隆出席無恥,張隆唔會出席,質疑張敏峯唔係民主派同路人,唔排除係建制派。

譚香文:居民憂初選泄私隱

譚香文話,上周六晚「反自動當選」嘅協調人因病缺席,佢當時已話要先向團隊匯報,未有最後共識;又收到居民擔心過程會泄漏私隱等問題,故對初選有保留。至於會唔會繼續協調,譚香文就話「兄弟爬山」。

區議員:譚香文推翻共識

當晚見證協調嘅兩名泛民觀塘區議員同Emily講,當日的確達成共識。區議員黃子健話,當晚已經傾到細節,包括私隱問題,張隆之後都有宣傳居民大會,認為譚香文嘅說法係完全推翻當時嘅共識。Emily睇番張隆fb,佢喺18日的確話同張敏峯一致認同搞居民大會。

張敏峯回應話,諗唔通張隆團隊有咩證據話佢係建制派,又話譚香文講過會讓路畀當區居民出選,結果空口講白話,再推翻協調共識,毫無誠信。張敏峯話,「反自動當選」有多區撞區,「試問香港人如何能相信『反自動當選運動』是同路人?」

上 / 下一篇新聞