港聞

港聞二

下一篇
上一篇

【Emily】服務理念:將開心帶畀市民 88歲夏蕙姨勢選灣仔區

【明報專訊】區議會選舉11月舉行,反修例風波令唔少素人有意出戰,連近年關心時事、人稱「夏蕙BB」嘅藝人黃夏蕙都話有意服務地區。佢喺facebook出post,話決定由「灣仔修頓球場區」出發,將和諧社區生活還畀市民,唔少網民聯想佢係咪要出戰區選。經理人就話,夏蕙BB的確係積極考慮緊,成數都有八成咁話。

話說88歲嘅夏蕙BB日前上載咗短片,提到「11月記住支持我」,噚日凌晨更發文提到對長者受虐一事感到痛心疾首,唔願意再見到呢啲事,又話決定由灣仔修頓球場區出發,將之前嘅和諧社區生活還畀市民,佢服務當區嘅理念係「將開心帶俾(畀)市民。盡我心,夢變真」。

經理人稱八成機會去馬

Emily聯絡夏蕙BB問個究竟,但佢就冇正面答,只係話咁大件事要諗好多嘢,「我幾十歲,仲搞乜嘢丫」,強調最緊要係大家平安過生活。夏蕙BB嘅經理人就話,佢的確積極考慮參戰,希望做社區嘅開心果;即使未能當選,都希望畀區議員一個警號,就係要真心為街坊服務。

當區區議員係報稱獨立嘅李碧儀,另外「灣仔起步」陳錦成亦有意披甲。夏蕙BB經理人話唔能夠受任何黨派影響,又話夏蕙BB好受街坊歡迎,每次都有好多人搵佢合照,聽落似乎無意協調喎。

相關字詞﹕黃夏蕙 修例風波 區議會選舉 反修例

上 / 下一篇新聞