港聞

港聞二

下一篇
上一篇

【Emily】港鐵不合作運動 「壽終正寢」

【明報專訊】有示威者喺反修例風暴中不時發起「不合作運動」,間中阻擋港鐵列車閂門,月初時試過令港鐵幾條線癱瘓,有市民表示理解,亦有市民覺得受滋擾。「不合作地鐵資訊頻道」前晚深夜公布,話由於引起社會各界紛爭,不斷收到各界對團隊嘅不解,以至團隊裏面手足對「港鐵不合作運動」效果存疑,團隊宣布港鐵不合作運動已經「壽終正寢」、「the operation-team is dead」,唔會設下任何重啟日子。

團隊對運動引起紛爭感抱歉

港鐵不合作運動團隊話,過去幾星期不斷深切反思和改變,亦請教咗唔同背景、政治立場人士意見,從而改進,不過不合作運動仍然引起各界紛爭,佢哋深感抱歉,話理解社會對不合作運動引起嘅不滿,甚至憤怒。團隊話,雖然罪魁禍首理應係一直漠視民意嘅特首林鄭月娥及濫用職權嘅香港警隊,但承認團隊展開不合作運動令部分市民不安,佢哋會竭力了解所有不足。

團隊認為,港鐵不合作運動失敗原因包括未完全了解社會各階層對運動嘅聲音、對事情發展後可引致嘅後果及影響掌握不足,及嚴重高估市民對運動嘅接受程度,因此行動已徹底、全面停低。

相關字詞﹕港鐵 不合作運動 反修例風暴

上 / 下一篇新聞