港聞

港聞二

下一篇
上一篇

【Emily】銀禧中學裝太陽能板 上網電價年收23萬

【明報專訊】兩電上年起推出「上網電價」計劃,向民間回購可再生能源,有中學參加咗計劃,其中一間係位於九龍塘嘅何明華會督銀禧中學,佢哋上個月喺校舍屋頂裝咗114塊太陽能板,上星期啟用。Emily噚日去參觀,校董李銳波話,系統每年可產電5.7萬千瓦,約等於160個4人家庭每月用電量,每年上網電價收入約有23萬元,會全數用嚟支持學生發展,包括發放獎助學金、環保及STEM(科學、科技、工程、數學)教育。

校長王莉莉同Emily講,太陽能板成本約95萬元,全數由校董李銳波同太太資助,好感謝校董「慷慨解囊」。李銳波話,希望項目除咗有助推動環保能源,都可以幫到同學仔學STEM,例如每塊太陽能板發放嘅功率數據,會實時上載去雲端,同學可以學用大數據預測溫度,又或者設計太陽能發電「智能家居」等。

除咗銀禧中學,直資中學香港李寶椿聯合世界書院都建設緊太陽能發電系統,最快下個月完工,屆時就會係全港最大規模嘅校園太陽能發電系統。

相關字詞﹕太陽能 何明華會督銀禧中學 上網電價

上 / 下一篇新聞