港聞

港聞二

上一篇

【Emily】創科賽冠軍 小學生智能手杖助長者「求救」

【明報專訊】𠵱家中小學都推緊STEM教育,喺學生學習過程中,都可以幫吓弱勢社群。樂善堂「第一屆關懷弱勢社群——全港創新科技設計大賽」,得獎作品有防止下坡傾倒嘅輪椅;亦有一把智能手杖,如果用嘅老人家跌低,會發聲同閃燈求助。

小學組冠軍得主係樂善堂楊仲明學校,該校學生研發咗一柄「順手牽杖 智能手杖」,識得偵測數據,如長者跌低或撳緊急掣時,就會發出SOS求救閃燈及響聲,引起路人注意及援助。手杖亦有裝置,幫手通知用家嘅屋企人,話畀佢哋聽長者已平安抵達家中。

何明華會督銀禧中學則憑「鄰.倚」贏得中學組冠軍,同學留意到輪椅使用者都會倒後落斜,但有一定危險,所以佢哋設計嘅呢架輪椅會自動調整前輪高度,令到輪椅可以水平咁落斜,令輪椅使用者更安全。九龍樂善堂主席楊小玲話,會加強硬件配合,支援學校推行STEM教育,亦希望喺推動創科之餘傳遞關懷身邊有需要人士嘅信息,用科學同創意貢獻社會。

上 / 下一篇新聞