港聞

港聞二

上一篇

寶礦力有人買嚟撐 有人買完倒

【明報專訊】近日有商業廣告捲入政治紛爭,「寶礦力」抽廣告事件之後,有人勁買寶礦力,有人罷買,建制派立法會議員何君堯前日深夜喺facebook上載相片,相中人就將寶礦力倒落廁所。

Emily留意到相中人應該唔係何君堯,而係用咗香港政研會主席關新偉嘅相。何君堯之後做fb直播話:「你係寶礦力呀,唔係『暴』礦力呀」,認為寶礦力傷咗廣大中國人民感情;又批評寶礦力喺政治立場方面「摸不着中心」、亂咁表態。

早前警察去大埔「連儂牆」撕走有警員資料嘅Memo紙,畀網民揶揄,「吉野家」日前喺fb出post話「唔好再叫我『獅子狗』」,推廣餐廳嘅火鍋,之後傳出負責廣告嘅員工被炒,有網民嗌抵制。沙田區議員麥潤培上年成功爭取吉野家喺「美食沙漠」馬鞍山開店,佢噚日喺fb出post話「罷食吉野家」,有人留言話「由您把口講更有說服力」。

沙田區議員籲罷食吉野家

香港吉野家噚日喺fb出post,話日前「出咗個post引起咗好多迴響,如果令到有人唔開心,喺到同大家講聲唔好意思」,仲話「所有小編由始至終都係齊齊整整」。

相關字詞﹕美食 梁振英 寶礦力 吉野家 何君堯

上 / 下一篇新聞