【明報專訊】前財政司長曾俊華自從前年落選特首後，不時協助推廣本地企業，最近佢為其擔任資深顧問嘅虛擬保險公司拍短片，話希望以行動啟發、推動創科發展。短片背景係2047年嘅香港，當時街上市民都係講普通話，曾俊華就明言希望同大家講廣東話。佢其他對白都相當有政治含意，包括提到「現實中好多嘢我哋都冇得揀」、「希望人人都有權自主」。
虛擬保險公司拍片 2047為背景
曾俊華喺短片中飾演嘅角色叫「華仔」，係「bowtie第八屆資深顧問」，佢喺facebook分享呢條短片時話，好彩唔係飾演劉德華喺《天若有情》嘅角色「華dee」，「不然就要跟他的All-Denim經典造型比下去了」。佢喺片中話，雖然現實中好多嘢都冇得揀，「我心痛嘅係，好多香港人連基本保障都冇」，所以買保險「香港人一定要自主」；又話眨吓眼已經到2047，雖然好多嘢仍然冇得揀，「但𠵱家香港人買保險有得自己話事，相信大家都好開心」。