港聞

港聞二

下一篇
上一篇

市民撐「孫家驊」留任「行政會」

【明報專訊】香港近月示威、請願活動浪接浪,除咗反對修訂《逃犯條例》嘅示威,亦有唔少市民表達支持政府以至警隊嘅聲音。噚日有一批自稱市民自發群組嘅人,去警察總部外遞交請願信,支持警隊執法、「嚴肅緝拿暴徒歸案」,同時亦支持行政會議成員葉劉淑儀、湯家驊等人留任行會。不過,信封上就將「行政會議」錯寫作「行政會」,「湯家驊」更被誤寫為「孫家驊」。

葉太影相助遮孫

獲邀出席嘅葉太見到呢個情况,都提點支持者寫錯字,但影相時就話「唔緊要啦,遮住啦」,用手遮住個「孫」字合照。

對於自由黨榮譽主席田北俊點名要求辭去行會一職,葉太就話自己同湯家驊盡忠職守,經常出嚟解釋修訂《逃犯條例》,佢反問田北俊:「我哋有邊句解錯吖?田北俊講唔講得出我邊句解釋條例解錯?佢有冇睇過成條條例?」葉太質疑,田北俊因為佢哋盡忠職守就惡意攻擊,「呢啲人(回歸)22年來為香港做過乜嘢?只係搞破壞!」

葉太其後亦喺facebook出post,明言自己會繼續留任行會,唔會輕易動搖。而自由黨張宇人噚日返立法會時被追問會唔會辭任行會,佢回應話唔會向傳媒談及有關問題,希望公眾明白。

相關字詞﹕行政會議 田北俊 政府 自由黨 《逃犯條例》 示威 湯家驊 香港 葉劉淑儀 逃犯條例

上 / 下一篇新聞