港聞

港聞二

下一篇
上一篇

軟餐食譜出書 長者可食「大騸雞」

【明報專訊】唔少老友記因為吞嚥困難,只可以食「糊仔」,啲食物望落都唔太開胃。近年有社福機構推廣色香味俱全嘅長者「軟食」,明愛安老服務機構噚日開《美食無限耆》新書發布會,介紹10款軟餐食譜,包括傳統中菜如「大騸雞」、梅菜扣肉、琵琶豆腐等,望落都令人食指大動!

Emily試食「大騸雞」,除咗口感唔同、軟滑啲之外,味道同一般嘅差不多,明愛註冊社工、高級督導主任敖巧兒話啲菜式全部來自院友「熟悉嘅懷舊味道」,仲話希望有社區照顧者可以照食譜煮番兩味畀家中老友記,「以往嘅糊餐好多都係打碎菜肉飯撈埋,長者見到未必想食。我哋希望有軟餐食譜,就算佢哋咬唔到啲食物,都一樣歎到美食」。食譜暫未公開發售,有興趣買嘅不妨向明愛查詢。

咁軟餐難唔難煮?Emily向明愛安老中心嘅廚師阿良偷師,阿良話部分菜式烹調及食材簡單,以「大騸雞」為例,只係將雞髀肉打碎,加入日本酵素凝固,再喺上面鋪雞蛋當雞皮,切件搞掂。Emily所見,有人帶埋外傭姐姐話嚟「學藝」,好開心以後可以有多幾款菜式畀長者食。

上 / 下一篇新聞