港聞

港聞二

下一篇
上一篇

聶德權:感受到大家唔信政府 fb再澄清唔搞「信用體系」

【明報專訊】有台灣傳媒報道粵港澳大灣區具體建設計劃時,指內地嘅「社會信用體系」將於香港實施,政制及內地事務局長聶德權日前喺facebook出post澄清「絕無此事」;結果引發網民質疑,一日就有約1500個留言,有人更質疑佢「搞港獨」。香港眾志秘書長黃之鋒亦留言「挑機」,質疑粵港澳大灣區要加快社會信用體系建設,竟然同香港無關,係咪想講香港唔係大灣區嘅一部分。

網上群情洶湧,聶德權噚日再出post,話帖文係佢開fb page以來最多人睇、留言同分享嘅一個,足以反映大家對大灣區嘅關注(或者擔心),佢亦感受到大家對政府嘅不信任,仲要標註「認同請分享」。

網民問何不開記招

聶德權長文解釋,網上流傳嘅係廣東省政府計劃,而非香港特區政府,措施主要覆蓋廣東省9個市,即使部分建議需香港配合,亦要雙方同意先落實。佢強調大灣區兩個最重要嘅原則,包括須符合「一國兩制」及措施須互惠互利,推出嘅措施要符合香港整體利益。呢個解釋繼續引來留言,唔少人留言質疑政府點解唔開記者會正式回應,質疑喺fb講有可信度咩。

相關字詞﹕政制及內地事務局 香港眾志 黃之鋒 粵港澳大灣區 傳媒 香港 台灣 大灣區

上 / 下一篇新聞