港聞

港聞二

下一篇
上一篇

行會唞暑6星期 多過去年

【明報專訊】行政會議6月休會兩星期,上周由特首辦改到禮賓府開會,噚日返番特首辦,相隔3星期,特首林鄭月娥噚日再次喺行會前見記者,係暑假前最後一次。行會宣布下周二(16日)起暑假休會,8月27日先復會。上年行會放咗約5個星期暑假,今年就多咗1個禮拜。

梁振英曾減至兩周

盤點行會過去放幾耐暑假,做咗近12年行會非官守召集人嘅前特首梁振英,一上任特首就將行會暑假由8、9個星期,大幅縮短至兩星期,當時佢話想「使到大家有比較充分時間去討論議程上的各個議題」。林太上場,行會喺2017年只係放咗兩星期暑假,林太話因為新政府上場,有好多事都想同行會成員討論,並配合當年10月發表首份《施政報告》。上年放暑假前最後一次行會,林太開會前見記者話暑假唔代表佢閒着,因為當時已啟動咗《施政報告》嘅諮詢。

今年《施政報告》嘅諮詢仲未展開,林太噚日見記者時亦無提到呢方面嘅工作。

相關字詞﹕反修例風暴 施政報告 林鄭月娥 放暑假 特首辦 行政會議

上 / 下一篇新聞