港聞

港聞二

下一篇
上一篇

何君堯同撐警集會暴力切割

【明報專訊】近期最流行嘅潮語,相信唔少得「割席」、「切割」,立法會議員何君堯上月30日發起撐警集會,其間有記者被撐警者潑水、扔泥,民主黨立法會議員林卓廷更遭撐警者襲擊。對於集會期間出現嘅暴力,何君堯噚日明言「任何暴力、違法行為,切割!與我哋無關,我哋亦唔會贊同」。

梁頌恆:網民講殺無赦實會被捕

何君堯噚日同青年新政召集人梁頌恆出席YahooTV節目《都市擂台》,其間就和平上街抑或激烈抗爭可以令政府聽民意激辯,雙方多次疊聲。梁頌恆批評警方選擇性執法,例如6月30日撐警集會期間,有人非禮港台女記者、襲擊少女,但警方就保護打人者離開,叫何君堯不如上Yahoo搜尋吓當日情况。梁頌恆又講番當年何君堯講「殺無赦」一事,話如果示威者網上講「殺無赦」,相信半夜3點已經被捕,質疑「選擇性執法係乜嘢法治?」

何君堯話梁頌恆以偏概全,話如果撐警集會期間有人犯法,歡迎舉報。節目後被問到呢個問題時,何話絕對唔會包庇違法行為,「梗係會譴責」,又話「咁大嘅人群裏面,個別事件發生,唔係我哋原則立場,我哋完全不認同」,話當日只係希望有地方寧靜表達訴求、以理服人。

上 / 下一篇新聞