港聞

港聞二

下一篇
上一篇

市民齊護連儂牆

【明報專訊】近日各區有人自設連儂牆,畀市民表達心聲,由於各種原因,部分「連儂牆」被清除,但亦有街坊挺身護牆,不單令連儂牆力保不失,更日益壯大。

義工修補被警查證

十幾個街坊包圍

東區區議員麥德正噚日喺fb發帖,話中午有義工修補西灣河行人天橋嘅連儂牆,畀幾個警員查身分證,十幾個街坊反包圍警員。麥德正形容有警員「識做」,話要查吓邊個部門負責執法然後離開。麥話好多街坊好有心,有事會挺身而出,唔同年紀都有;又話警方做番應該做嘅事,就唔會有咁多麻煩。

大埔墟港鐵站附近行人隧道內嘅連儂牆噚日被清除,有市民喺fb嘅大埔群組上載影片,有個女人到場撕走彩紙,又同街坊口角。有街坊喺被毀嘅位置重貼彩紙,上面鋪透明膠紙,令到連儂牆擴至整條隧道。

不過唔係所有連儂牆都守得住,中西區區議員甘乃威話上環連儂牆被電訊盈科要求移除,因為張貼位置屬該公司物業,最後將連儂牆移至上環文化廣場嘅電箱旁。

上 / 下一篇新聞