港聞

港聞二

下一篇
上一篇

「無理由請VVIP嚟畀人鬧」 憂嘉賓安全 民記撤會慶酒會

【明報專訊】近日示威持續,建制派亦甚為低調,民建聯原定今日喺中環舉行27周年會慶酒會,不過未有一早向傳媒發採訪通知,估唔到未通知就已決定取消。民記噚日傍晚發聲明,宣布取消酒會,話鑑於近期社會氣氛同埋不時出現衝突亂象,為免出席嘉賓不便同存在安全風險,更唔希望發生突發事件而危害到途人安全,及令中環核心地帶出現交通堵塞,考慮後中委會決定取消酒會,並向受邀嘉賓致歉。

旺角酒樓會慶亦取消

Emily聽聞,民記九西支部計劃本月22號喺旺角一酒樓舉辦嘅會慶,考慮後亦決定取消,相信稍後會向已買飛者退款。

有民記領導層同Emily講,今日酒會原定喺中環交易廣場舉行,出席嘅包括特首林鄭月娥、中聯辦主任王志民等一眾中西環官員,預料有多達800至1000名嘉賓,佢話網民「吹雞」好快,擔心真係會畀示威者圍堵,形容即使有警方嚴密保護,但始終出席嘅係「VVIP」,「無理由請佢哋嚟畀人鬧」;一旦警方執法令會場外出現激烈衝突亦唔好睇,所以中委噚日召開特別會議後決定取消酒會,消息人士就話錢並唔係考慮因素喎。

有連登仔噚日傍晚發帖文公布民記「秘密酒會」嘅時間、地點,表明係可靠消息,資料唔會有錯,民記中人透露,取消酒會嘅決定係早於連登仔公開資訊喎。

上 / 下一篇新聞