港聞

港聞二

下一篇
上一篇

認知障礙老友記 演話劇改善記憶力

【明報專訊】老當益壯嘅老友記閒時可以打下麻將,落公園聽下歌,如果患上認知障礙又可以點呢?葵涌醫院今年成立咗「樂齡劇社」,畀老友記參加演出,對患認知障礙或有情緒問題嘅老友記有治療作用。有老友記參加咗之後,話有助記憶力,成個人仲積極、開心咗。

葵涌醫院成立「樂齡劇社」

葵涌醫院其實早喺2001年已經成立話劇團,上年就同醫院入面嘅老齡精神科日間護理中心成立戲劇工作坊,上年底仲曾經喺荔景社區會堂演出,參加嘅都係70歲以上老友記,劇名就叫《全家福》,講親家為禮金、湊孫而起爭端。

89歲嘅江鏡泉飾演新娘嘅大伯,佢4年前確診輕度認知障礙,佢話記對白有助記憶力,「上文下理一定要記住,如果唔係牛頭不對馬嘴,人哋跟唔到」。佢太太話老公參加之後叻咗好多,「佢有文有路咁講對白,做晒成台戲」。

負責寫劇本嘅精神科資深護師蘇偉生話,會以老友記熟悉嘅人物、劇情、環境寫劇本,而鼓勵認知障礙症患者回想,對病情亦有幫助。

上 / 下一篇新聞