港聞

港聞二

下一篇
上一篇

梁君彥立會外遭指罵 示威者要求傳媒刪相

【明報專訊】立法會大樓受衝擊損毁,議員近日見傳媒時都要喺門外行人路。立法會主席梁君彥噚日下晝同傳媒講大樓善後工作,十幾名市民一早等候準備示威,梁君彥甫現身就被大罵,有人鬧佢係「大口狗」;去到佢發言時,示威者繼續高聲叫罵,引起部分記者不滿,完場後一度輕微口角。

梁君彥噚日見記者十幾分鐘,有人喺對開中信大廈天橋上加入指罵,梁發言後由秘書處人員陪同下返回立會大樓,其間示威者追上前繼續斥責梁君彥,有記者拍攝,但示威者就要求記者刪相。記者解釋傳媒有採訪自由,香港亦無肖像權,佢哋無權要求刪相,擾攘一輪後示威者散去。經民聯梁美芬前日亦被「狙擊」,佢噚日重返「案發現場」,搵嚟10多名婦女支持者護航,更帶隊「巡視」立法會,其間佢嘅支持者與示威者再爆罵戰,最後要警員介入先無事。

相關字詞﹕梁美芬 梁君彥

上 / 下一篇新聞