港聞

港聞二

下一篇
上一篇

如想做「落地獄」民調 需修飾問法 鍾庭耀:可問林鄭來生會係點

【明報專訊】「港大民意研究計劃」今個月起轉型為「香港民意研究所」,需要眾籌600萬元做起動資金。主席兼行政總裁鍾庭耀噚日接受商台訪問期間,被問到民調可唔可以問特首林鄭月娥會否落地獄嘅問題,佢就話可以將條問題修飾吓,例如問如果林太有來生嘅話會係點。唔知大家會唔會即刻想「課金」問呢條問題呢?

林太會上天堂定落地獄呢條問題,近日突然備受關注。鍾庭耀話,一條民調問題大約要1.2萬元,噚日喺商台節目《在晴朗的一天出發》嘅訪問,主持人話收到信息,有聽眾話願意畀1.2萬元問林太會唔會落地獄,雖然主持本身都「打定輸數」,但鍾庭耀就明言「咁又唔可以咁講」,佢話可以問「希望如果佢(林太)有來生的話係點」,選項分別係上天堂、落地獄或者畀佢懺悔。

已籌115萬 承諾無政治禁區

鍾庭耀承諾民研唔會有政治禁區,又話有個別問題好宣泄情緒,如果要做調查,應該係「工工整整」,民調唔係幫手鬧人,但透過科學調查可能畀到新啟示。佢提到,過往唔方便做嘅議題,如果公民社會提出要求都會做。

鍾庭耀早前宣布港大民研脫離港大另起爐灶後,需要眾籌600萬元起動,上月底佢喺訪問中話只籌到約2萬元,噚日佢就宣布暫時籌得約115萬元;過往每兩周做一次嘅特首民望調查暫時唔需要中斷,因為佢已經撥咗當中48萬元,足夠做4次調查,佢仲希望公布方式可以更深入,例如廣邀專家學者深入討論。

相關字詞﹕鍾庭耀 民意 林鄭 眾籌 特首林鄭月娥 民調 港大民研 情緒 林鄭月娥

上 / 下一篇新聞