港聞

港聞二

下一篇
上一篇

去七一遊行 「葉德嫻」內地網部分消失

【明報專訊】藝人葉德嫻(Deanie姐)近年關心社會議題,早年仲唱《撐起雨傘》聲援佔領運動。今年七一遊行延續反對《逃犯條例》修訂嘅訴求,Deanie姐當日拎住「撤回惡法,林鄭下台」嘅標語遊行,身體力行之後,噚日有報道話,有內地音樂平台將Deanie姐嘅歌下架。Deanie姐就透過助理覆Emily話冇回應喇。

Emily噚日下晝去唔同內地音樂平台試過搵,喺「蝦米音樂」搵到Deanie姐嘅歌,但喺「網易雲音樂」、「QQ音樂」、「酷狗音樂」平台輸入「叶德娴」,就搵唔到任何資料,再去「華語女歌手」嗰頁搵都冇。至於為Deanie姐攞咗唔少影后嘅電影《桃姐》,各大內地影音平台都仲有,但喺優酷同愛奇藝,《桃姐》嘅主要演員就唔見Deanie姐嗰名。

另一邊廂,「like」咗反修例照片嘅藝人汪明荃就無受影響,喺各大內地音樂平台都搵到佢嘅資料。究竟Deanie姐係咪最近先「被消失」,就不得而知。

相關字詞﹕歌曲下架 葉德嫻 反修例風暴 七一遊行

上 / 下一篇新聞