港聞

港聞二

下一篇
上一篇

立會畫作受損 畫家:體諒唔會鬧

【明報專訊】示威者本周一(1日)晚上衝擊並佔據立法會大樓,有畫作遭到損毁或塗污,有畫作作者分別喺facebook出post,對畫作受損能夠理解、體諒。其中一名藝術家管偉邦就向Emily講,唔會責備進入立法會嘅年輕人,反而對佢哋可能要面對以年計嘅刑責覺得心痛,又話如果立法會搵佢重製畫作,佢打算唔收費,以免增加立法會裝修費用。

藝術家盼政府聽民意

管偉邦噚日喺fb話,對於畫作被弄髒,「我並不心痛,大不了就是重畫;我心痛的,只是那班甘願為香港付出沈(沉)重代價的年輕人」。佢同Emily講,有關畫作名為《和而不同》,畫嘅係竹林,意味立法會內各人發表不同聲音,希望大家互相尊重。佢又話作為70後,見到年輕人面對咁大壓力覺得好心痛,強調唔會責備,因為佢哋嘅表達係有原因,希望政府可以聆聽市民心聲、回應訴求。

另一藝術家林東鵬亦喺fb出post,其畫作《百年香港》張貼立法會內,佢話畫作若受破壞,能理解及體諒,「萬萬不能忍受的,是當權者的麻木不仁與虛偽、以制度玩弄市民、對訴求充耳不聞及部份警員過分的暴力。畫,與市民同在」。

相關字詞﹕示威 年輕人 藝術

上 / 下一篇新聞