港聞

港聞二

下一篇
上一篇

見傳媒後遭示威者狙擊 美芬搭唔到的士

【明報專訊】經民聯梁美芬(Priscilla)噚日喺立法會大樓外會見傳媒,發聲明譴責七一衝擊立法會事件,佢見傳媒後打算離開,但沿路遇到示威者「狙擊」, 一度要走入旁邊嘅中信大廈,之後打算搭的士離開現場時,唔知咩嘢原因,兩架的士先後無載佢,經過5分鐘後,Priscilla要折返立法會並進入大樓,喺助理同立法會保安保護下先擺脫到示威者。

被批憑乜做議員 反問:係咪中國人

Priscilla下晝見傳媒後,被民陣副召集人陳皓桓同幾名市民尾隨斥責,陳皓桓批評Priscilla「憑乜嘢做香港人嘅議員」,Priscilla就多次反問追罵佢嘅市民係咪中國人、識唔識法律同知唔知咩係言論自由,皺住眉叫示威者唔好「害死一國兩制」,示威者就反斥Priscilla「害死年輕人」。

Prisiclla一度開門坐上一架的士,但司機話唔載客,結果佢要行番出車,佢嘅同行友人幫佢敲另一部的士嘅車門,問載唔載客,同被拒絕,最終Priscilla要返大樓,隔咗約大半個鐘待市民散去,先步出大樓搭私家車離開。有網民笑言今次事件係「道德兩難」,究竟應該譴責的士司機,定要感激佢拒絕Priscilla上車?

Prisiclla無驚,話小事一宗,事後仲上載媒體足版「狙擊」片,留言重申片中佢講嘅「你知唔知咩係言論自由?」佢又落tag反駁,「仲郁手郁腳」、「仲好意思話我敗走」。

相關字詞﹕逃犯條例 梁美芬

上 / 下一篇新聞