港聞

港聞二

上一篇

中國現代化展 土改文革未提死傷

【明報專訊】今年係中華人民共和國成立70周年,國家博物館同香港歷史博物館合作,今日起至8月26日舉辦《現代化之路—共和國70年》展覽,用210件展品同230張圖片介紹70年嚟中國嘅現代化進程。Emily留意到展覽中有提到土地改革同文化大革命,但無提兩次事件入面出現過批鬥同死傷。

展覽用咗過百報章、糧票、畫報等,同埋大量歷史照片,由經濟、教育、科技、文化、體育、民生講起中國嘅現代化,包括展出首支中國製嘅無縫鋼管,睇到國家當時嘅科技;有全國第一張股票,展示經濟發展。展覽並展出由港人投資嘅白天鵝賓館嘅協議文件,顯示港人對國家現代化嘅重要地位。

Emily留意到,展覽有展示土地改革法嘅條文、大躍進嘅畫報,同文化大革命時嘅革命現代歌舞劇宣傳畫,除咗喺大躍進展品有寫過「(大躍進)由於違背經濟和社會發展的客觀規律,結果使工農業生產和國民經濟遭到嚴重破壞」之外,文革呢個議題點到即止,而土地改革法嘅介紹就話係令「廣大市民獲得了土地和其他生產資料,佔中國人口絕大多數的農民獲得了解放」,隻字不提呢3場運動中曾經發生嘅批鬥或者傷亡事件。

歷史館長:國家博物館籌劃

歷史博物館館長(展覽及研究)張銳森話,成個展覽都係由國家博物館籌劃,由構思放置嘅文物,到所有嘅文字稿,都由國家博物館提供,歷史博物館淨係提供咗約40件藏品及相關描述。問到展覽唔提六四事件,亦未提土改同文革詳情,張銳森就話,因為今次主題係講現代化,六四唔喺展覽嘅範圍,所以就無專登放入展覽。

相關字詞﹕文化大革命 歷史博物館

上 / 下一篇新聞