港聞

港聞二

下一篇
上一篇

跪地勸勿衝立會 林卓廷:示威者禮貌道歉

【明報專訊】七一下晝有少數示威者用裝滿雜物嘅鐵籠車撞擊立法會側門議員通道入口及玻璃幕牆,幾名泛民立法會議員嘗試勸喻同阻止,民主黨林卓廷更一度跪地求年輕人唔好衝擊。Emily噚日同阿廷傾開,佢話當時幾名議員同示威者喺度鬥大力,佢哋想阻住鐵籠車衝前,但年輕人唔理會,佢一時忍唔住,只好跪求年輕人三思。阿廷又話,前晚示威者闖入立法會後,佢又喺立法會外遇番推鐵籠車嘅示威青年,對方有禮貌地同佢道歉,問有無整親議員!

阿廷話,當時同公民黨郭家麒、街工梁耀忠及黨友尹兆堅等多名議員嘗試一齊做人盾,企喺立法會外阻擋示威者衝擊。佢話自己都好激動,同示威者講衝擊好危險、代價好大,或會被捕同被控暴動罪,但有年輕人回應話明白咁做有咩後果,又話其他方法都試過,政府都唔聽,所以先去衝擊。結果雙方就鬥大力,推住鐵籠車僵持,最終阿廷等議員游說失敗,梁耀忠仲被一名示威者熊抱式推走。

阿廷又話,6月30日撐警集會期間,佢行經海富天橋畀幾十個挺警者圍攻,有人高呼「掟佢落去(天橋)」,又畀個大嬸用長傘插肚,覺得情况比噚日嘅示威者暴力。

上 / 下一篇新聞