港聞

港聞二

下一篇
上一篇

梁君彥肖像相 去咗連儂牆 感覺「傷心」又「冇乜所謂」

【明報專訊】多名示威者前晚佔據立法會期間,有人分別將立法會主席梁君彥、前主席范徐麗泰等人嘅照片拆下、塗污,兩主席噚日都分別回應。梁君彥起初話「梗係傷心、心痛」,其後又話冇乜所謂;范太就話「小事一件」、唔使緊張,仲話原來佢都冇揀過擺咩相喺會議廳外,但亦強調衝擊立法會係不幸。

范太:小事一件

Emily噚日凌晨眼見,梁君彥嘅相遭塗污後,被丟喺政府總部「連儂牆」外,旁邊就係象徵悼念早前墮樓身亡並表達「反送中」等訴求嘅梁凌杰嘅黃色雨衣。梁君彥噚日見記者時,唔少行家都關心吓佢嘅感受,佢起初話「梗係傷心、心痛」,係對整體立法會受破壞而心痛;其後有行家追問,係咪因為佢工作做得唔好,所以受到咁嘅對待?梁君彥就話呢樣嘢要每個人去睇,「我就冇乜所謂,掛番張相上去啫」。

范太就話係「小事一件」,提到佢仲做緊立法會主席時都冇相掛,淨係塊木板度有主席個名,係去到搬入新立法會大樓先至擺佢幅相上去,擺上去張相個樣係點佢都冇特別揀過,所以整爛佢嘅畫像都唔緊要。

但范太都留意到回歸後3個主席嘅畫像爛咗(另一係曾鈺成),港英時期兩個立法局主席黃宏發及施偉賢嘅畫像就無大破損。

相關字詞﹕立法會主席 范徐麗泰 回歸 佔領立法會 示威者 梁君彥 反送中 立法會

上 / 下一篇新聞