港聞

港聞二

下一篇
上一篇

fb貼黑衣人撐黑傘相 網民盼小米小編平安

【明報專訊】反修訂《逃犯條例》抗爭運動,好多示威者都著上黑衫,同警方衝突時又撐起雨傘擋胡椒噴劑。內地企業「小米」香港facebook專頁前日上載咗張相介紹佢哋出品嘅自動摺疊傘,兩個身穿黑衣嘅模特兒同撐一把傘,仲形容「無論幾大風雨,面對幾大困難我哋都唔會棄大家,不離不棄!」唔知係咪對應緊香港現時局勢,引發網民熱議、獲得8000幾個like。

介紹小米出品自動摺疊傘

網民好擔心fb小編嘅安全,叫佢記得報平安;有網民就話應該永世都唔會like小米嘅post,但專登留個言畀專頁管理員。小米小編亦上水回應網民:「有心。」有人問把傘有冇其他顏色,例如係淺藍?小編回應「不了」。

另一網民關心呢個係咪小編嘅「辭職post」,亦有人大讚呢個post成功吸引好多人氣,話小編嘅對答似曲又直,「在如今黑暗籠罩着的香港,好像很能安慰人心」;又呼籲佢係熱血嘅話就唔好做「無間道」,「香港地,有很多公司爭着請你的」。

小米小編無忘記要介紹公司產品嘅工作,附上LED燈連結,話「米兔希望能夠喺呢度為大家黑暗中帶來一盞燭光,悲傷中帶來一點歡樂」。

相關字詞﹕修訂逃犯條例

上 / 下一篇新聞