港聞

港聞二

下一篇
上一篇

長毛談「新四人幫」搞錯雙聰 田北俊抽水:每個特首你都叫落台

【明報專訊】反對修訂《逃犯條例》風波牽連到政府管治問題,噚日港台節目《城市論壇》亦討論呢個議題,其間立法會前議員梁國雄(長毛)形容現時有「新四人幫」,但除咗特首林鄭月娥、保安局長李家超同埋立法會主席梁君彥之外,第四個人竟然係香港眾志常委羅冠聰?

盧偉聰錯讀羅冠聰

「四人幫」係指文革時王洪文、張春橋、江青同姚文元嘅四人政治集團。話說噚日長毛喺城市論壇上話現時有新四人幫,「林鄭、羅冠聰、李家超,仲有……4個人!」長毛又批評林太擺警察上枱,如果唔係6月9日大遊行後政府仍堅持恢復二讀,12號就冇人出嚟示威。同場嘅阿聰似乎一頭霧水點解會被點名,其後主持追問長毛,佢先話新四人幫分別係「盧偉聰、李家超、林鄭、梁君彥」,一時口誤將警務處長盧偉聰講咗「羅冠聰」。

同場嘅自由黨榮譽主席田北俊(田大少)就被問到去唔去七一遊行,田大少話遊行唔係佢強項,成世人都未遊行過,但今次個心係支持遊行班人。佢又抽長毛水,講到香港未來係後生仔嘅時候,就提到「長毛我同你好大年紀啦,唯一分別係我有錢,你少錢過我,不如我哋睇睇點處理香港未來」;當長毛話林太應該落台時,田大少就話「我識咗你十幾廿年,每個特首你都叫落台」。

相關字詞﹕自由黨 七一遊行 香港眾志 立法會議員 梁國雄 梁君彥 盧偉聰 李家超 保安局 林鄭月娥

上 / 下一篇新聞