港聞

港聞二

下一篇
上一篇

反修例廣告登各地報章 美法日9地今出街

【明報專訊】二十國集團(G20)峰會今明兩日喺日本大阪舉行,有反對修訂《逃犯條例》嘅網民早前眾籌喺各地報章登廣告,爭取國際關注。首輪廣告連同公開信噚日「出街」,facebook專頁「Freedom HONG KONG」話,率先刊登嘅包括英國《衛報》、德國《南德意志報》、加拿大《環球郵報》、歐盟Politico網上版,今日則喺日本、法國、美國等9地登廣告。

Freedom HONG KONG邀請網民「用自己方法」影低報紙,標注「#FreedomHK」,將反修例嘅關注傳開。參與登報過程嘅居德港人「石賈墨」喺facebook上載 《南德意志報》政治版嘅全版廣告同公開信,形容係「創造歷史」,佢話廣告右下角有個字「ViSdP」,即係「出版物法規負責人」,佢原本想用「一班關心香港嘅香港人」身分,但由於要負法律責任,最終決定用自己真名,但認為「Credit係要畀晒每一個人」。

網傳韓國頭版廣告位被搶

不過,噚晚有網民喺網上討論區「連登」貼文,聲稱韓國《中央日報》本來今日喺頭版登廣告,最後關頭畀一個品牌飲品用「天價」搶走廣告位。Emily唔知呢個消息真偽,今日都要睇吓嗰個頭版係咩先。另外,有反修例嘅港人噚日趁G20峰會前夕喺大阪鬧市集會,舉起「Save Hong Kong(拯救香港)」等標語,爭取國際社會關注。

相關字詞﹕爭取國際關注 各地報紙登廣告 反修例風暴

上 / 下一篇新聞