港聞

港聞二

下一篇
上一篇

帶「唯唯」改圖上立會 張超雄:呢位網民講得好

【明報專訊】藝人梁競徽(唯唯,前稱梁烈唯)最近成為反對修訂《逃犯條例》市民嘅惡搞對象,「唯唯」嘅相都被配上反修例字句。工黨張超雄噚日喺立法會討論修例風波時緊貼潮流,將一幅「唯唯」改圖帶入會議廳,形容相中「網民」「真係幾好,講得好清楚」,因為呢位「網民」話要成立獨立調查委員會,調查警察被指濫用武力,「行得正企得正怕咩,除非身有屎」。

早前反修例大遊行中,有示威者舉起「唯唯」相片標語,被鏡頭錄下後出現喺外國新聞節目,今次張超雄可謂繼續將惡搞發揚光大。唔少反修例網民見到張超雄呢個舉動,都話支持「唯唯」成立獨立調查委員會嘅訴求,講笑話張超雄應該幫「唯唯」打格仔,保護身分;亦有網民講笑話,現時「唯唯反修例立場」見晒光,獲得民意,睇嚟都可以參選下屆立法會。

相關字詞﹕唯唯 梁烈唯 梁競徽 張超雄

上 / 下一篇新聞