港聞

港聞二

下一篇
上一篇

泛民批「聽令中聯辦」 麗芸反駁被叫停 Ann姐喝李慧琼:唔好叫我個名

【明報專訊】立法會噚日繼續討論如何喺《逃犯條例》修例風波後恢復社會和平嘅休會動議,專業議政葉建源發言時,批評中聯辦一聲令下建制派就全部歸位,民建聯蔣麗芸(Ann姐)聞言起身激動反駁,同屬民建聯、當時正主持會議嘅內會主席李慧琼(Starry)嘗試叫停Ann姐,但換嚟Ann姐憤怒指罵:「你唔好叫我個名!」

葉建源發言時,形容市民不再信任議會,因為議會未能做到有效平衡,議會喺建制派全力配合下,令不受市民歡迎嘅施政都可通過,中聯辦一聲令下建制派就會全部歸位。

Ann姐聞言起身反駁,問對方「咩中環西環一聲令下,你聽過咩?」,話如果自己唔回應,就即係承認葉嘅講法。Starry見狀就嘗試叫停Ann姐,但Ann姐指住Starry鬧,結果被熄咪,Starry話議員如果要回應其他議員嘅說話內容,可以按掣要求發言。

葉建源之後繼續發言,正行出會議廳嘅Ann姐再次按捺不住,高聲反問葉:「市民幾時有睇到(中聯辦下令)呀?喺邊度睇到呀?你講!」Starry再次要求Ann姐保持肅靜,工聯會麥美娟亦行埋去Ann姐隔籬,用手捉住Ann姐勸交,詎料Ann姐一手撥開,並高聲話:「嗱你唔好郁我!」最終Ann姐離場後,會議先繼續。

相關字詞﹕葉建源 李慧琼 蔣麗芸 休會動議 逃犯條例修訂

上 / 下一篇新聞