港聞

港聞二

下一篇
上一篇

拉鏈修補被𠝹橫額 藝術家:有不滿拉吓就算

【明報專訊】政界人士相信都有街上橫額被𠝹爛嘅經歷,藝術家程展緯近日發現,大埔一帶嘅「反送中」橫額都被𠝹爛,一向有創意嘅佢,為橫額縫上拉鏈,仲留低紙條,叫「刀手」如果不滿市民發聲抗惡法,拉吓拉鏈就算,希望可以多理解上街市民嘅憤怒原因。

程展緯喺facebook發帖,提到11個月前,工黨張超雄一張呼籲市民關注老人院舍問題嘅橫額被𠝹爛,當時佢用拉鏈維修後,留低字句同刀手講,大家都會老;後來「冇一張非建制橫額可以完整維持一周」嘅呢個魔咒解除咗,「竟然近11個月內再沒有banner被割破」。

「社區內矛盾我們自己解決」

直至近日有「反送中」橫額懸掛該區,程展緯再用拉鏈補番,但今次刀手再冇停手,甚至𠝹爛成條索帶,不過程展緯見到張超雄鄰近嘅安老院舍橫額就完整保留,「我還是感到希望的」。程展緯話,囡囡曾經問佢點解唔報警,但一來佢唔係物主,二來市民喺今次抗爭嘅秩序係有溫度、有分享、有包容,「我們已經有自治日常的可能和準備,社區內的矛盾我們自己解決,我想這是最好的方向」。

相關字詞﹕送中 抗爭 創意 安老院舍 張超雄 反送中 藝術

上 / 下一篇新聞