港聞

港聞二

下一篇
上一篇

批梁美芬奴才 郭榮鏗首被逐 梁大叫「我係中國人」 象哥調停

【明報專訊】立法會噚日討論休會待續議案,討論如何解決社會當前撕裂,不過修補撕裂未成,會議廳火氣卻因議案變得更盛。公民黨法律界議員郭榮鏗(Dennis)發言時,批評經民聯梁美芬(Priscilla)以至建制派喺《逃犯條例》修例事件係「奴才」,佢拒絕應主席梁君彥要求收回言論而被逐出場;Priscilla其間表現激動反駁Dennis,不停高叫「我係中國人」嚟回應,要民建聯黃定光(象哥)出手調停。

事緣Dennis以「奴才」指斥梁美芬同建制派,Priscilla隨即提出規程問題,質疑「奴隸」兩字具冒犯性。

郭:諗唔到更好嘅詞語形容

Dennis話自己批評對方係「奴才」,但表明唔會收番,結果梁君彥暫停會議聽聲帶,之後裁定言論冒犯同侮辱,要求Dennis收回言論,否則趕佢離場。Dennis堅持唔收回,又引用名言話有啲人正因為不懂說不,所以先會做奴隸,表明「唔會收回、唔會撤回、唔會暫緩,亦都唔會喺呢個會期之後自己失效」,「用奴才去形容呢班人絕對係便宜咗佢哋」。Dennis由2012年做議員至今,今次係首次被逐離場。

梁:被逐符社會期望

Dennis被逐後向傳媒形容,建制派心知修例為香港帶來壞影響,但喺中聯辦指使下仍支持,罔顧港人利益,佢諗唔到比奴才或奴隸更好嘅詞語形容。而佢見傳媒時,Priscilla亦企喺附近影住Dennis,Priscilla話尊重不同政見,但議員唔應該人身攻擊,對Dennis言論感到遺憾,希望文明議政,形容對方被趕出會議廳係符合社會期望。

相關字詞﹕立法會 奴才 奴隸 社會撕裂 梁美芬 郭榮鏗

上 / 下一篇新聞