港聞

港聞二

上一篇

阿彪喜獲8磅巨無霸

【明報專訊】工聯會鄧家彪喜獲麟兒,噚日同Emily分享喜悅,不過佢話過程有啲驚險,事源太太前日中午開始陣痛,痛到噚日朝早9點,差唔多成20個鐘,以為可以順產,但未入產房,護士睇到BB心跳有啲弱,擔心有風險,所以醫生即時幫太太開刀。佢話太太好辛苦,好彩最後母子平安,個BB仲要係8.2磅嘅「巨無霸」。

阿彪有個10歲嘅囡囡鄧澄,當年係開刀生,所以太太無咁辛苦,阿彪睇到今次太太捱咗咁多個鐘都覺得好心痛,話真係要對老婆好啲。佢話未為阿仔改名,但咁重秤,希望個仔穩陣啲,有咩大風大浪都可以站穩陣腳;而囡囡完全無呷醋,仲好熱烈期待細佬出世,噚日一放學就去醫院探媽咪同細佬,好開心有BB畀佢玩呀。

上 / 下一篇新聞