港聞

港聞二

下一篇
上一篇

Sing Hallelujah to the Lord 今晚告別示威區

【明報專訊】立法會外近期不時氣氛緊張,警員同反對《逃犯條例》修訂嘅示威者對峙,但由上周二夜晚起,一班教徒喺立法會附近高唱Sing Hallelujah to the Lord,等大家平靜心境,令呢首歌成為反修例示威嘅「名曲」,連嚟香港採訪嘅外媒都講起呢首歌。不過,唱埋今晚,呢首歌可能唔會再喺示威區響起。

祈禱會今晚移師終院外

喺立法會「煲底」示威區主持祈禱會嘅麥神父同Emily講,天主教同基督教個邊都有傾好,噚晚係祈禱會喺立法會外最後一晚,今晚會移師終審法院外,之後就唔會再喺示威區搞祈禱會,即係冇得再繼續聽Sing Hallelujah to the Lord。

麥神父話,希望嚟緊都唔會再有需要喺示威區搞祈禱會,話已經搞咗幾晚都要休息吓,叫大家唔好因為咁而落寞。

天主教香港教區輔理主教夏志誠噚日都有到「煲底」同青年祈禱,佢話睇完特首嘅記者會後,覺得要再到示威區,因為擔心青年會失望。

夏志誠望喚醒官員良心

夏主教仲話,政府仍未理解人民嘅訴求,亦無回應到任何實質嘅訴求,但唔希望見到政府要被市民強迫,希望官員嘅良心能被喚醒,聽到人民心聲。

祈禱會之後亦都有一批自發嘅基督徒繼續唱唔同嘅聖詩,仲有中文版嘅Sing Hallelujah to the Lord𠻹。

上 / 下一篇新聞