港聞

港聞二

下一篇
上一篇

百物看世界 大英博物館巡展 光纖代表香港參展

【明報專訊】石器時代嘅狩獵工具、古埃及木乃伊棺槨,喺歷史書可能睇得多,大家有無諗過喺香港可以睇到?香港文化博物館即日至9月舉辦「百物看世界——大英博物館藏品展」,展出約260件、合共101組展品,以時序策展,介紹古今200萬年世界歷史,其中4件展品係首次喺呢個巡迴展亮相,包括美索不達米亞烏爾城軍旗、日本浮世繪畫家葛飾北齋1831年作品《神奈川沖浪裏》。

巡迴到港 今起展出

展覽由大英博物館係800萬件館藏中,選出100組有代表性嘅文物,喺世界巡迴展覽,之前去過法國同上海,今次輪到香港。展覽另一特色,係每個主辦國家或地方都要構思第101組、有代表性嘅專屬物件展出,今次香港揀咗「光纖」做代表品,館方話,光纖改變世界,促進互聯網發達,而光纖之父高錕同香港有好深淵源,所以就用咗光纖。

大英博物館百物展策展人Belinda Crerar同Emily講,每次展覽展品都會「微調」,香港展品有幾樣係之前未展出過,包括《神奈川沖浪裏》版畫。版畫以日本富士山為背景,描繪漁夫掌控漁船同巨浪抗爭,相信留意日本文化嘅港人會有印象。

展出百萬年前手斧

文化博物館館長(藝術)楊麗中話佢最鍾意嘅展品係公元前2500年美索不達米亞烏爾城軍旗,軍旗功用至今未明,以馬賽克圖案、阿富汗青金石、黃和紅石灰岩等製成,一面描繪戰爭、另一面描繪和平嘅飲宴場面。而最古老展品莫過於非洲坦桑尼亞出土、120萬至140萬年前嘅手斧,象徵人類文明進化到懂以工具獵食。

上 / 下一篇新聞